Француската ЕДФ ја проверува состојбата на новиот нуклеарен реактор во Фламанвил на северозападот на земјата, кој автоматски се исклучи само еден ден по неговото стартување. Тимовите на EДФ го стартуваа Европскиот реактор под притисок (EПР) на 3 септември, но тој автоматски се исклучи веќе следното утро.

Првите наоди водат до заклучок дека инцидентот „може да е поврзан со неправилна конфигурација на инсталацијата“. Реакторот поминува низ „долг и сложен процес на стартување кој бара бројни испитувања и тестови и понекогаш може да предизвика (автоматско) исклучување“, пренесува AФП, објави Пословни.хр. Најновиот реактор на ЕДФ требаше да биде модел за новата генерација електрани што ги сака претседателот Емануел Макрон во наредните децении.

Тој беше завршен со 12 години задоцнување, по цена од 13,2 милијарди евра, приближно четири пати повеќе од планираното. Истите модели на реактор веќе се пуштени во употреба во Кина и Финска.

„Финскиот ИПР имаше неколку прекини, особено поврзани со хидрауличните пумпи кои беа неисправни и требаше да се заменат“, рече Николас Голдберг од Коломбус Консалтинг.

„Автоматското исклучување не го доведува во прашање стартот на реакторот. Треба само да бидеме трпеливи“, смета Голдберг. Во мај, EДФ инсталираше ураниумско гориво во реакторот и спроведе серија тестови. Во понеделникот, компанијата доби дозвола од француската агенција за нуклеарна безбедност AСН да започне реакција на фисија. Реакторот има капацитет од 1.600 мегавати и ќе биде најголемиот производител на електрична енергија во Франција, снабдувајќи со електрична енергија околу три милиони домаќинства.