Новинарите се подготвуваат за бојкот доколку Собранието до Нова година не ги изгласа измените на Кривичниот законик со кој се предвидува поголема заштита за новинарите и медиумските работници и казна до 3 годни затвор за напади врз новинари. Од Здружението на новинари на Македонија (ЗНМ) и од новинарскиот синдикат ССНМ се разочарани што пратениците го игнорираат овој закон кој уште лани во јуни е доставен до Собранието од страна на тогашниот мнинистер за правда Бојан Маричиќ.

Претседателот на новинарскиот синдикат Павле Беловски вели дека ќе остават уште малку простор со цел пратениците да ги усвојат измените, а во спротовно ќе следува бојкот.

– Самостојниот синдикат на новинари и медиумски работници практично пет години чека на овие измени на Кривичниот закон со цел поголема заштита на новинарите. Во собраниска процедура тие влегоа на средина на минатата година и едноставно нема разумно објаснување зошто досега не се усвоени. Неофицијалното објаснување е дека на истата седница имало други спорни закони и затоа сета процедура се одложува. Декларативно сите пратеници, политичари функционери се залагаат за подобрување на безбедноста на новинарите и медиумските работници, како и за прекин на неказнивоста на нападите врз новинарите и дека измените не се спорни, но практично речиси ништо не е преземено. На 2 ноември, Меѓународниот ден против неказнивоста на злосторствата врз новинарите и медиумските работници беше најавен бојкот доколку набрзо не бидат усвоени измените кои ги бараме. Во каква форма и кога би започнал тој бојкот ќе зборуваме после нова година, бидејќи оставаме уште малку простор измените конечно да бидат изгласани – вели Беловски за „Слободен печат“.