Српските студенти кои од ноември го блокираа Филозофскиот факултет во Нови Сад и мала група граѓани, кои се собраа на нивен повик откако деканот Миливој Алановиќ утрово влезе во факултетот, сè уште се пред високообразовната институција, а им се придружи и група земјоделци со трактори. Студентите се распоредени на сите влезови, а поставија и шатор. Тракторите се паркирани на платото пред факултетот, јавува „Н1“.

Ова се случува откако деканот Алановиќ и група од десетина професори утрово насила влегоа во зградата, по што ги избркале студентите надвор. Тој во изјава за медиумите рече дека ништо необично не се случило утрово, туку дека група професори едноставно влегле на нивните работни места, по што ги замолиле студентите да ги земат своите лични работи и да го напуштат факултетот за да може тој да почне да се подготвува.

Во меѓувреме, студентите објавија снимка на која се гледа како деканот и професорите во просториите на факултетот ја јадат храната која на студентите им ја донеле граѓани.

Tetkice i zaposleni jedu donacije koje smo dobili od građana… pic.twitter.com/eTVcdPdki7

— Blokada FFUNS (@BlokadaFFUNS) August 26, 2025

Деканот Алановиќ изјави дека заедно со професорите кои дошле ќе останат внатре до понатамошно известување, сè додека ситуацијата не се нормализира. Филозофскиот факултет во Нови Сад претходно објави дека испитниот рок на 1 септември, или надоместокот за декемврискиот испитен рок, ќе се одржи од 1 до 9 септември. На 22 август, факултетот објави дека онлајн регистрацијата за вториот уписен рок ќе се одржи на 4 и 5 септември, а приемниот испит на 8 септември.

Филозофскиот факултет беше првиот од факултетите во Нови Сад што влезе во блокада во декември минатата година. На електронска седница одржана од 6 до 8 јуни, Наставно-научниот совет донесе одлука за надоместокот на наставата во зимскиот и летниот семестар од академската 2024/25 година.