Директорот на Агенцијата за катастар на недвижности Иван Живковски информира дека предложил до Управниот одбор на Агенцијата да се намалат цените на катастарските услуги до 75 отсто. Целата постапка финиширала, а Владата го усвоила новиот тарифник. Според Живковски, новите цени стапиле пред три недели и граѓаните веќе плаќаат помали цени за услугите што ги добиваат.

Директорот на Агенцијата за катастар на недвижности, на прес-конференција го претстави и новиот портал „е-услуги“, кој овозможува брз електронски пристап до 94 различни услуги од Катастарот. Станува збор за нов проект, кој им овозможува на корисниците услугите да ги добијат веднаш по нарачката преку електронска пошта, што значително го скратува времето и го олеснува пристапот за граѓаните и за правните лица.

– До крајот на годината ќе бидат додадени уште десетина нови услуги, а во текот на 2025 година се предвидува дополнително проширување за уште десет услуги. Дополнително, сите корисници ќе можат да се најавуваат преку Системот за единствена најава (СЕН), управуван од Министерството за дигитална трансформација – соопшти Живковски.

Тој откри и дека наследиле околу 5.600 заостанати предмети што не биле решени дури и по шест-седум месеци. Според Живковски, успеале да ги решат сите тие предмети, а во моментов имаат наплив на нови.

– По неколку саботи и секој месец работиме прекувремено за да се завршат сите работи. Сите предмети тековно се решаваат и немаме застој – додаде Живковски.