Најмалку 16 летови до и од лондонскиот аеродром Хитроу се откажани денес, еден ден откако проблемите со британскиот систем за контрола на воздушниот сообраќај предизвикаа големи прекини на многу од аеродромите во земјата.

Веб-страницата на Хитроу – најголемиот и најпрометниот аеродром во Европа – соопшти дека најмалку 16 летови, вклучувајќи ги оние до Брисел и Торонто и оние што се очекуваат од Њујорк и Берлин, беа откажани денес.

Британскиот воздушен сообраќај беше накратко прекинат во средата поради „технички проблем“, соопшти Националната служба за воздушен сообраќај (НАТС).

Проблемот доведе до откажување на неколку летови, иако подоцна беше обновено нормалното работење на аеродромите.

„Во процес сме на враќање на нормалното работење (на аеродромите) во областа на Лондон“, соопшти НАТС во објава на својот профил на платформата Икс вчера, извинувајќи се за „непријатноста“.

Дефектот – втор што го погоди НАТС за две години – ги погоди лондонските аеродроми Хитроу и Гетвик, како и Единбург, со 122 откажани летови до 21:30 часот по источно време, според фирмата за анализа на летови Cirium.

Главниот оперативен директор на Рајанер, Нил Мекмахон, побара оставка од извршниот директор на НАТС, Мартин Ролф, велејќи дека не се научени лекции од претходниот дефект, кој беше предизвикан од дефект во системот за автоматска обработка на летови во август 2023 година.

„Скандалозно е што патниците повторно беа подложени на одложувања и прекини“, додаде тој.

Главниот оперативен директор на „Изиџет“, Дејвид Морган, изјави дека е „крајно разочарувачки“ што дефектот „може да предизвика проблеми за нашите клиенти во овој важен период од годината“.

Портпаролот на британското Министерство за транспорт изјави дека „тесно соработува“ со НАТС за да се утврди што го предизвикало проблемот, за кој се вели дека потекнува од контролниот центар во Свонвик, Југозападна Англија.

Министерката за транспорт, Хајди Александар, изјави дека ќе се сретне со Ролф во четврток за да „разбере што се случило и (да размисли) како може да се спречи тоа повторно да се случи“.

Во март, пожар во електрична трафостаница предизвика големи прекини на аеродромот Хитроу, поради што аеродромот беше затворен еден ден.

Покрај тоа, кон крајот на август 2023 година, широко распространет дефект во системот за контрола на летот предизвика проблеми при враќањето во Велика Британија на илјадници патници по празничниот викенд. Речиси 2.000 летови беа откажани за два дена.

Технички проблем ги парализира летовите во Велика Британија