Мигрантите се обиделе да ја преминат границата на полско-белоруската граница во најмалку два наврати во вторникот вечерта, објави полската гранична стража, а тензиите се уште се присутни поради дипломатскиот притисок од полскиот премиер кој се наоѓа на турнеја низ земјите на ЕУ.

Иако бројот на мигранти на границата е намален, Варшава најави дека повторените инциденти укажуваат на можна промена на тактиката на Минск, но не и на одбивањето на Минск да ги користи мигрантите кои бегаат од Блискиот Исток и други области како оружје во спорот со Европската унија.

Полската гранична стража соопшти дека група од стотина мигранти се обиделе да пробијат оградата . Друга група од 40 мигранти двапати се обидела да ја пробие границата кај селото Миелник. Тие фрлале камења, гранки и шок бомби врз полските погранични сили, при што бил повреден еден полски граничар.

Полскиот премиер Матеуш Моравјецки, пак, во вторникот ги посети Будимпешта и Загреб, потоа Париз, а подоцна во средата и Љубљана.

Невладината организација „Хјуман рајтс воч“ во средата ги обвини и Белорусија и Полска дека се виновни за „тешки прекршувања на човековите права“ од страна на мигрантите и барателите на азил на границата меѓу двете земји.

Според извештајот на „Хјуман Рајтс Воч“, двете влади „имаат обврска да спречат нови смртни случаи со обезбедување редовен пристап до хуманитарна помош за луѓето заглавени во пограничната област“.

Истражителите на оваа организација изјавија дека разговарале со неколкумина мигранти кои им рекле дека биле „избркани од полски граничари, со употреба на сила“.

ХРВ посочува дека овие протерувања се „кршење на правото на азил предвидено со европското законодавство“ и ја повикува ЕУ „да почне да се солидаризира со жртвите од двете страни на границата, кои страдаат и умираат“.

Што се однесува до Белорусија, невладината организација предупредува дека „вообичаено е насилството, нечовечкото и понижувачко постапување и притисокот од страна на белоруските граничари“.