Новоименуваната амбасадорка на Грција во земјава, Софија Филипиду денеска му ги предаде акредитивните писма на претседателот Стево Пендаровски и на церемонијата во Вила Водно оцени дека со потпишувањето на Преспанскиот договор се создаде позитивна и конструктивна атмосфера во односите меѓу двете држави.

Претседателот Пендаровски, како што соопшти невговиот кабинет, изразил уверување дека Република Северна Македонија ќе продолжи да биде активно посветена на спроведувањето на Преспанскиот договор и на натамошното продлабочување на соработката со Хеленската Република и изразил очекување дека и грчката страна ќе продолжи да вложува напори во насока на спроведување на Договорот, посебно во делот на проширувањето на правната рамка, која, според него, е значаен предуслов за натамошно јакнење на соработката на билатерален план.

–Денес, Северна Македонија и Хеленската Република се сојузници во НАТО, двете држави ги поврзува заедничката визија и посветеност за мир, стабилност, благосостојба и економски просперитет во Регионот и во глобални рамки, како и блиските културни и хумани вредности, кои се клучни елементи во градењето на побезбедна и попросперитетна иднина за нашите граѓани. Нашето сојузништво во НАТО добива уште поголемо значење за целиот регион, во светло на руската воена агресија врз Украина и бројните предизвици кои таа ги создава за сите земји во Европа, но и пошироко. Во таа смисла, натамошната интеграција на Западниот Балкан во Европската Унија е дополнителна гаранција за стабилноста и просперитетот на овој дел од Европа, изјави Пендаровски.

Амбасадорката Филипиду пак, оценила дека интензивирањето на билатералните средби на високо ниво е доказ за зголеменото зближување меѓу двете држави.

– Грција е силно посветена на унапредување на севкупните односи и искреното пријателство со Република Северна Македонија. Оттука, очекуваме интензивирање на напорите за целосно, доследно и со добра волја спроведување на Договорот од Преспа. Ја поздравуваме Северна Македонија за одржувањето на првата меѓувладина конференција што го отвори патот на европската интеграција. Грција отсекогаш ги поддржувала и промовирала европските амбиции на Западен Балкан, вклучително и на Република Северна Македонија и е подготвена да ја обезбеди својата експертиза за олеснување на процесот, рече амбасадорката Филипиду.