Матео Арналди, италијанскиот тенисер нема да биде следниот противник на Новак Ѓоковиќ во третото коло на Олимписките игри во Париз, иако многумина тоа го очекуваа. Доминик Кепфер во второто коло победи против Арналди со 2:1, по сетови 3:6, 6:2, 6:1, а во следната рунда ќе се соочи со Ѓоковиќ.

Инаку, Германецот е дури 70 рангиран тенисер во светот, додека Арналди е 45 на АТП листата и претходно го исфрли Артур Фис, па се очекуваше лесно да ја надмине втората пречка, особено по освојувањето на првиот сет.

Мечот меѓу Италијанецот и Германецот траеше еден час и 30 минути, а во првиот сет Арналди двапати му го одзема сервисот на својот ривал, додека на Кепфер тоа му успеа само еднаш.

Во вториот дел од играта видовме сосема поинаква ситуација, бидејќи Кепфер направи два брејка, додека на свој сервис загуби само еден поен во четири гема, а изедначи во сетови.

На стартот од третиот сет, Арналди пропушти три брејк можности, што го чинеше во следниот гем, кога Германецот поведе со 2:0. Следниот сервис гем Кепфер го доби со нула, а потоа направи уште еден брејк и потврди за 5:0.

Германскиот тенисер имаше две меч топки на сервис на својот ривал, но Арналди се извлече и го продолжи мечот. Сепак, во следниот гем Кепфер ја искористи меч топката и го затвори мечот, а закажа дуел со Новак.

Ѓоковиќ и Кепфер до сега се сретнале само еднаш, а Новак победи со 2:1 во сетови во Рим во 2020 година.