Во сила стапи нова регулатива за батериите, која ќе обезбеди тие во иднина да имаат мал јаглероден отпечаток, објави Европската комисија. Батериите ќе користат минимално штетни материи, ќе бараат помалку суровини од земјите кои не се членки на ЕУ и во голема мера ќе се собираат, повторно ќе се користат и ќе се рециклираат во Европа, информира СТА.

„Со ова ќе ја поддржиме транзицијата кон циркуларна економија, ќе ја зголемиме доверливоста на снабдувањето со суровини и енергија и ќе ја зајакнеме стратешката автономија на ЕУ“, соопштија од Брисел.

Во согласност со целите на Европскиот зелен договор, Регулативата за батерии е првата легислатива што зазема пристап со целосен животен циклус. Набавката, производството, користењето и рециклирањето се дефинирани во еден закон, пишуваат во соопштението.

Како што додадоа во Брисел, батериите се клучни за промовирање на зелената транзиција, поддржувајќи ја одржливата мобилност и придонесуваат за климатска неутралност до 2050 година.

Од 2025 година, регулативата предвидува постепено воведување барања во врска со декларации, класи на изведба и го ограничува јаглеродниот отпечаток на електричните возила, транспортни средства како што се електрични велосипеди и скутери и индустриски батерии на полнење.