Бројот на луѓе во Јапонија на возраст од 100 години или порасна на рекордни речиси 100.000. Поставувајќи нов рекорд 55-та година по ред, бројот на стогодишници во Јапонија достигна 99.763 во септември. Од тој број, жените сочинуваат огромни 88 отсто, пишува Би-би-си.

Јапонците имаат најдолг животен век во светот и најчесто се појавуваат на листите на најстарите живи луѓе во светот – иако некои студии го доведуваат во прашање точниот број на стогодишници во светот. Тоа е исто така едно од најбрзо стареечките општества, каде што жителите често имаат поздрава исхрана, но и ниска стапка на наталитет.

Најстарата личност во Јапонија е Шигеко Кагава, 114-годишна жена од Јаматокоријама, предградие на градот Нара. Најстариот маж е Кијотака Мизуно, на 111 години, од крајбрежниот град Ивата.

Министерот за здравство Такамаро Фукока им честиташе на 87.784 жени и 11.979 мажи стогодишници за нивната долговечност и изрази „благодарност за нивниот долгогодишен придонес во развојот на општеството“.

Податоците биле објавени пред Денот на старите лица во Јапонија, 15 септември, национален празник на кој новите стогодишници добиваат честитка и сребрен чаша од премиерот. Оваа година, право на тоа имале 52.310 луѓе, соопштило Министерството за здравство.

Во 1960-тите, Јапонија имала најмал процент на луѓе постари 100 години меѓу земјите од Г7 – но ова драматично се промени во децениите што следеле. Кога владата започнала анкетата за стогодишници во 1963 година, имало само 153 лица на возраст од 100 или повеќе години. Тој број пораснал на 1.000 во 1981 година, а во 1998 година достигнал 10.000.

Подолгиот животен век во голема мера се припишува на помалиот број смртни случаи од срцеви заболувања и чести видови рак, особено рак на дојка и простата. Јапонија има ниски стапки на дебелина – клучен фактор за двете заболувања – благодарение на исхраната сиромашна со црвено месо, а богата со риба и зеленчук.

Стапката на дебелина е особено ниска кај жените, што делумно објаснува зошто Јапонките имаат значително подолг животен век од мажите. Додека остатокот од светот консумирал сè повеќе шеќер и сол, Јапонија тргнала по спротивниот пат – со јавни здравствени кампањи кои успешно ги убедиле луѓето да го намалат внесот на сол.

Меѓутоа, не станува збор само за исхраната. Јапонците имаат навика да останат активни и во подоцнежните години, пешачејќи и користејќи јавен превоз повеќе од постарите луѓе во САД и Европа.

Радио Таисо, секојдневна групна вежба, е дел од јапонската култура од 1928 година, кога бил воведена за зајакнување на заедништвото и промовирање на здравјето. Триминутната рутина се емитува на телевизија и се практикува во малите заедници низ целата земја.