Норвешкиот државен инвестициски фонд, вреден два билиони долари, денес објави дека ги раскинува сите договори со менаџерите што управуваат со неговите израелски инвестиции и дека продал дел од своето портфолио во таа земја поради ситуацијата во Газа и на Западниот Брег.

Одлуката, според Ројтерс, следеше по вонредната ревизија започната минатата недела по медиумските извештаи дека фондот инвестирал во израелска компанија што произведува авионски мотори и обезбедува услуги за израелската војска, вклучително и одржување на борбени авиони.

Фондот, кој работи како дел од централната банка на Норвешка, имал удели во 61 израелска компанија од 30 јуни.
Како што е наведено во соопштението, во последните неколку дена тој продал акции во 11 од тие компании.

„Сега целосно се откажавме од тие позиции“, се наведува во соопштението на фондот, додавајќи дека инвестициите во израелски компании сè уште се разгледуваат за можни нови повлекувања.

Претходно, парламентот на Норвешка, во јуни, го отфрли предлогот за повлекување на фондот од сите компании што работат на окупираните палестински територии, потсетува Ројтерс.