Анализата на норвешкиот информативен и финансиски портал Финанспласен, кој користеше јавно достапни податоци од повеќе институции, утврди дека нордиските земји се најподготвени за безготовинска иднина во споредба со остатокот од Европа. Меѓу другото, во анализата се користени податоци за бројот на банкомати и бројот на терминали за плаќање со картички на 100.000 луѓе, лимитот што може да се потроши при плаќање со картичка и бројот на оние кои користат интернет банкарство. Како што изјави портпаролот на Финанспласен, помалку банкомати значи дека државата помалку се потпира на готовина, а повеќе терминали за плаќање со картички значи дека има поголема инфраструктура за електронски трансфер на пари.

Споменатата анализа покажа дека Норвешка е најподготвена за безготовинска иднина. Имено, оваа земја е меѓу оние со најмал број банкомати и во која дури 96 отсто од населението користи интернет банкарство. Кога станува збор за подготвеноста за безготовинска иднина, Финска и Данска се на второ и трето место бидејќи имаат малку повеќе банкомати од Норвешка и нешто помалку терминали за плаќање со картички, но во овие земји има речиси ист број на луѓе кои користат интернет банкарство. Меѓу првите 10 земји се Холандија, Шведска, Исланд, Естонија, Литванија, Кипар и Швајцарија, додека Ерменија, Грузија и Германија се меѓу најмалку подготвените за безготовинска иднина.

Оле Петерсон од Финанспласен изјави за Еуроњуз дека на населението во нордиските земји особено им се корисни системите без готовина бидејќи им помагаат да надминат некои од предизвиците, како што се ретката популација или тешките временски услови кои ги отежнуваат конвенционалните, готовински плаќања. Како што истакна Петерсон, овие земји имаат голема предност бидејќи нивните граѓани имаат доверба во јавните институции и затоа што имаат мала популација, што им го олеснува тестирањето на новите политики. Повеќето европски потрошувачи претпочитаат плаќање со картички или други форми на безготовинско плаќање бидејќи сметаат дека е попогодно. Сепак, 60 отсто од нив сè уште сакаат да се задржат плаќањата во готовина, пренесува Кликс.ба.