Ландо Норис негира дека неговиот тим Мекларен има непобедлив Ф1 автомобил, инсистирајќи на тоа дека оние кои го тврдат тоа „сакаат да зборуваат глупости“.

Мекларен ги освои првите две трки од сезонава, а Норис и неговиот тимски колега Оскар Пјастри постигнаа по една победа.

Мекларен беше доминантен на почетокот на новата сезона и сака да додаде уште една конструкторска титула на онаа од минатата година, како и првиот шампионски трофеј во конкуренција на возачи од 2008 година.

Иако покажа силно темпо на воведните две рунди, Норис тврди дека не е толку доминантен како што некои луѓе го прават.

– Мислам дека луѓето што велат оти сме непобедливи едноставно сакаат да зборуваат глупости. Ваша работа како медиуми е да го откриете тоа, а не само да слушате што зборуваат некои и потоа да пишувате – ги „искара“ Норис медиумите.

Автомобилите на Макларен имаат предност во однос на остатокот од тимовите, што Норис и Пјастри го докажаа на воведните две трки. Првиот од пол позиција дојде до победа во Мелбурн, а вториот доминираше во кинеската трка откако ја освои својата прва пол позиција во кариерата.

Building on a strong start 💪#McLaren | #BahrainGP 🇧🇭 pic.twitter.com/J09RrcBeYR

— McLaren (@McLarenF1) April 9, 2025

Тоа се очекуваше и во Јапонија минатито викенд. Но Верстапен со неговиот Ред Бул му ги помати сметките на Мекларен на трката во Сузука, која ја освои од пол позицијата.

Следната трка е во Бахреин претстојниов викенд и на неа Мекларен, според експертите повторно е фаворит. Таа улога и големите очекувања како да го оптоваруваат Норис, што може да биде проблем за овој возач кој во сезонава влезе како фаворит за титулата.