Улогата на американскиот воен персонал во планирањето и спроведувањето на воените операции во Украина е многу позначајна отколку што се веруваше претходно, пишува Њујорк Тајмс, прецизирајќи дека американски разузнавачи стојат зад најважните удари на украинските вооружени сили против Русија.

Во Визбаден на почетокот на 2022 година беше формиран штаб за интеракција и заедничка акција меѓу Украина и САД. Американците беа вклучени во планирањето и обезбедувањето координати, а украинските вооружени сили ги изведоа нападите.

Секое утро, американскиот и украинскиот воен персонал идентификуваа цели за удари – руски борбени единици, воена опрема и инфраструктура.

Американците, заедно со коалициските разузнавачи, ги прегледаа сателитските снимки, радио преносите и пресретнуваа комуникации за да ги утврдат локациите на руските трупи. Работната група потоа ги пренесе координатите на целите на Украинците, кои потоа извршија удари врз нив.

Сепак, во средината на 2023 година, се појави несогласување, наведува медиумот. Зеленски ја поддржа идејата на генералот Сирски да го нападне Бахмут, додека Американците инсистираа на удари во насока на Мелитопол.

По повеќемесечни подготовки, започна контраофанзива, но наместо да се пробие до Азовското Море, имаше мал напредок и заземање на неколку села.

Бајден сфати дека планот не успеа и почна да ги укинува ограничувањата. САД одобриле напади на руска територија, создавајќи „оперативна зона“ длабока до 80 километри.

Во август 2024 година, украинските вооружени сили ја започнаа операцијата Курск без дозвола од САД, прекршувајќи ги условите на „оперативната зона“.

Од друга страна, есента 2024 година започна руската офанзива на Покровск. САД побараа да се намали старосната граница за регрутирање во украинските вооружени сили, но Зеленски одби.

„Истрагата на новинарите на „Њујорк тајмс“ покажува дека Америка била многу повеќе вклучена во воениот конфликт отколку што се мислело досега“, се вели во написот.

Новинарите тврдат дека ова партнерство било „основата на украинските воени операции“.

Весникот наведува низа податоци за ударите на украинските вооружени сили врз позициите на руските војници, вклучително и командните пунктови. Исто така, се тврди дека Украинците ги извршиле нападите користејќи беспилотни поморски дронови, користејќи разузнавање на ЦИА.

Дополнително, се известува дека командата на вооружените сили на Украина дознала за локацијата на крстосувачот „Москва“ од Американците, иако тие не ги координирале своите акции со Вашингтон.

Пентагон претходно го негираше извештајот на Си-ен-ен дека САД доставиле разузнавачки информации за локацијата на рускиот брод на украинската војска.

Од друга страна руското министерство за одбрана не потврди дека украинските вооружени сили го нападнале ракетниот крстосувач Москва. Она што е познато е дека руското министерство за одбрана соопшти дека ноќта на 14 април 2022 година избувнал пожар на крстосувачот Москва, кој довел до детонација на муниција.