Според денешните мерења, констатирано е дека нивото на водата во Охридското Езеро продолжува да опаѓа, надминувајќи ја границата под дозволениот минимум. Според сознанијата, нивото на водата во езерото е на котата 693,08 метри надморска височина што е 24 сантиметри под просекот за декември.

Инаку, нивото на водата во езерото моментално е два сантиметри под дозволениот минимум, утврден на котата 693,10 метри надморска височина.

Состојбата со негативниот водостој не се подобри и покрај обилните врнежи што го зафатија регионот изминатите денови.

Флуктуацијата на нивото на водата во езерото има негативни последици по многу аспекти, но најмногу се одразува во крајбрежниот дел што инаку е најважен во езерскиот еко-систем.