Српскиот ас Новак Ѓоковиќ изминатата вечер уште еднаш покажа дека и понатаму може да игра на највисоко ниво и со 3-0 во сетови (6-3, 6-3, 6-2) го елиминираше Германецот Јан Ленард Штруф и си го обезбеди местото меѓу најдобрите осум на годинешниот САД Опен.

Ѓоковиќ започна фуриозно и ги освои првите четири гема за само околу 15 минути игра, навестувајќи дека нема намера да му дозволи на Штруф ниту најмала шанса. Сепак, кон средината на првиот сет дојде до кратка криза кога за првпат го загуби својот сервис, но брзо се врати во ритам и со сигурен финиш го освои сетот.

Вториот сет донесе поголем отпор од страна на Германецот, но само до резултат 3-3. Потоа Новак повторно го зголеми интензитетот, врза три гема и поведе со 2-0. Во третиот сет, Ѓоковиќ продолжи со исто темпо, експресно поведувајќи со 3-0, а до крајот сигурно го чуваше својот сервис за да стигне до нова победа без загубен сет.

Во четвртфиналето, Ѓоковиќ ќе се сретне со Американецот Тејлор Фриц, кој претходно го совлада Чехот Махач.