Од околу 700 лица без документи, кои институциите ги нарекуваат „фантоми“ досега 650 поднеле барање за да  бидат внесени во матичната книга на родени, но ниту еден не е запишан во матичната книга и нема добиено единствен матичен број, вели Народниот правобранител Насер Зибери.

– Јас и моите помошници констатиравме многу пропусти во однос на евиденцијата на „невидливите“  лица. Исто така констатиравме и недостаток на воља поради што не го гледаме решението  на повидок. Важно е да се потенцира дека околу 300 од барањата се делумно одобрени и имаат половичен матичен број, но се уште не можат да го остварат правото на социјална и здравствена помош како и вработување со задолжително социјално осигурување.  Единствено им се овозможува да добијат право на образование, вели Зибери.

Следната среда договорен е состанок со претставници од Министерството за труд и социјална политика, на кој правобранителот се надева дека ќе се најде решение за проблемот на оваа група граѓани кои се обесправени по сите основи.

–  До Владата ќе доставиме информација за утврдените состојби со предлог да се продолжи важноста на Законот за неевидентираните лица во матичната книга на родените, со оглед дека рокот до кога неевидентираните лица во матичната книга на родените (чии податоци се внесени или ќе се внесат), може да поднесат барање до Управата за водење на матичните книги е до 30 јуни оваа година. Ние имавме средба со претставници од државни органи и институции кои се должни да го спроведуваат Законот за неевидентирани лица или да вршат надзор над неговото спроведување, која ја организираа Одделот за заштита на правата на детето заедно со Одделението за граѓански состојби при Народниот правобранител, поттикнати од проблемите со кои се соочуваат голем број лица при имплементацијата наовој Закон.На средбата присуствуваа претставници од Министерството за правда, Министерството за внатрешни работи, Управата за водење на матичните книги, Министерство за труд и социјална политика, Министерство за образование и наука, и Агенција за вработување, рече Зибери.

Тој нагласува дека е потребно да се засилат теренските активности за пронаоѓање на лицата кои се пријавиле на јавниот повик и истите да се информираат за правата кои Законот им ги признава доколку поднесат барање за упис во посебната матична книга на родените, како и да се преземат активности со цел утврдување на бројот на деца кои се родени по завршување на јавниот повик, а не ги исполнуваат условите за запишување во матичната книга на родените согласно со закон, потсетувајќи дека Законот за неевидентирани лица се однесува и за оваа група неевидентирани деца, за кои надлежните немаат евиденција.

Проблемот е лоциран во тоа што евиденциониот број е непрепознатлив за интегрираниот систем на работење на институциите, како и поради недоволната соработка и координираност на институциите, додава Народниот правобранител.