Нема време, ни сериозни иницијативи за кои би се дискутирало на Економско-социјалниот совет, а би биле во прилог на евентуално повисокиот праг на минималецот во март. Според тековните параметри за пресметка на минималната плата, таа би се зголемила од сегашните 22.500 на 24.400 денари, што претставува раст од околу 1.900 денари. Тоа значи дека пусти биле желбите на министерот за економија и труд за работниците да добијат 600 евра, или пак за јавно искажаната подготвеност на Северозападната комора за исплата на 500 евра.

Владата засега не планира да им излезе во пресрет на работодавачите и да ги растовари за дел од давачките за минималната плата, односно да се откаже од дел од придонесите, кои сега се 47,5 отсто. За разлика од нашите власти, деновиве и од Владата на босанската Федерација истакнаа дека во идните предлози ќе вклучат и ослободување на газдите од данокот за делот на платите над 512 евра, што се смета за позитивен чекор кон зачувување на работните места и поддршка на малите стопанственици и занаетчии. Од Кабинетот на премиерот Христијан Мицкоски за „Слободен печат“ велат дека до нив не е пристигната никаква иницијатива.

– Ова е барање кое до Владата официјално не е пристигнато. Апелираме и ги повикуваме сите оние што учествуваат и се дел од Економско-социјален совет овие прашања да ги отворат на седниците каде што ќе ги аргументираме ставовите, мислењата, но најважно и можностите – посочуваат од Владата за нашиот медиум.

Висината на минималната плата во бруто-износ секоја година се усогласува со 50 отсто од порастот на просечната исплатена нето-плата за претходната година и 50 отсто од порастот на индексот на трошоците за живот, според податоците од Државниот завод за статистика (ДЗС). Според таа процена, во март 2025 година минималната плата би изнесувала околу 24.400 денари. Од синдикатот велат 24.400 денари не се доволни за достоинствен живот. Минималната синдикална кошничка одамна надмина 1.000 евра. Толку пари му се потребни на четиричлено семејство за да го помине месецот. Синдикатот бараше минималецот да изнесува 450 евра.

– Мислам дека на наредната седница, на ЕСС ќе ги презентираме нашите аргументи со кои располагаме за да ги убедиме затоа што мораме да се убедуваме за потребите од растот на сите плати, вклучително и минималната плата – вели претседателот на ССМ, Слободан Трендафилов.

Министерот Дурмиши веќе се изјасни дека за да има зголемување на минималната плата, како што бараат синдикатите, треба да се направи смена на законот, а за тоа треба зелено светло од Економскиот-социјалниот совет. Според него, сите одлуки мора да се носат откако претходно ќе се слушнат барањата на сите инволвирани страни, а не само на работниците.

– Одлуките мора да се носат со консензус и мора да се слушнат барањата и на работниците и на бизнисот. Сепак, компаниите се тие што ги креираат работните места. Мора да се носат мерки што ќе значат раст и развој на економијата и отворање подобро платени работни места и зголемување на животниот стандард на граѓаните – нагласи Дурмиши.

За разлика од нас, Црна Гора воведе две минимални плати за вработените во зависност од образованието. За оние со средно и пониско образование, минималецот ќе биде 600, а за вработените со вишо и повисоко образование од тоа – 800 евра. Минималната плата во Бугарија ќе се зголеми на околу 500 евра, а во Србија синдикатите од 15 август почнаа преговори за зголемување на минималецот од 400 на 528 евра.

Според последните податоци, 25.000 работници примаат плата во висина на минималната, а 10.000 работници земаат плата од 1 денар до 22.000 денари.