Кратење на трошоците за возила и за репрезентација, но и разрешување на сите функционери за кои ќе бидат констатирани неправилности во работењето, најави вицепремиерот за спречување на корупција, за одржлив развој и за човечки ресурси, Љупчо Николовски.

– На врвот во агендата на Владата останува борбата против криминалот и корупцијата, како и стеснување на просторот и можностите за трошење на функционерите, најави денеска Николовски кој најави оти во постапка е изготвување на уредби за репрезентација, поконкретно колку може и што да потроши директор, заменик-министер или министер за таа намена.

Николовски порача дека како било досега, така ќе биде и од сега, односно ќе следува разрешување за секој функционер во чие работење ќе бидат утврдени неправилности.

– Имаме разрешено повеќе директори, заменици-директори, претседатели на управни и на надзорни одбори, отколку што предложила Државната комисија за спречување на корупцијата, а за кои информациите стигнаа до мене директно од граѓаните и медиумите, нагласи вицепремиерот за спречување на корупција.

Во делот на користење на возилата, тој најави ревизија, т.е. кратење на непродуктивните трошоци на што се надоврза со „повеќе пари за граѓаните“.

За Љупчо Николовски, како и за министерот за правда, Бојан Маричиќ се најавени интерпелации од ВМРО-ДПМНЕ, постапка што неодамна ја „преживеа“ Никола Димитров.