Изградбата на брзата пруга низ Македонија ќе биде најзначајниот инфраструктурен проект во Југоисточна Европа и ќе донесе огромен економски бенефит за целиот регион, истакна вицепремиерот и министер за транспорт, Александар Николоски.

Тој нагласи дека проектот значително ќе го намали времето на патување. Од Скопје до Солун ќе се патува само 1 час и 20 минути, а до Атина за околу четири часа.

– Брзата пруга колку што е бенефит за Македонија, уште повеќе е за Грција, бидејќи целосно ќе ги отвори солунското и атинското пристаниште кон Централна Европа. Веќе во првата година од нејзиното пуштање во употреба, приходите на македонските железници ќе се зголемат од сегашни 12 милиони на 120 милиони евра – рече Николоски.

Грчките власти, според него, се согласни уште следната година да почнат изградба на двоколосечна пруга од Солун до Гевгелија, по примерот на македонската страна, а директорите на железничките претпријатија на двете земји веќе ги усогласуваат техничките детали.