Ники Хејли, која се бори за номинација на републиканците на претседателските избори во САД, му забранила пристап на „Дејли мејл“ до својата кампања откако британскиот таблоид објави низа вести дека таа го изневерила својот сопруг пред 15 години.

Репортер и фотограф на „Дејли мејл“ биле „замолени да го напуштат“ предизборниот собир на Хејли во Њу Хемпшир спроти гласањето за претседателски кандидат на републиканците во таа сојузна држава, а потоа биле информирани дека им се забранува учество на настаните до крајот на кампањата. Претставничката Чејни Дентон го известила уредникот дека весникот „пишува лаги“ за кандидатката.

Проблематичен е написот на „Дејли мејл“ дека Хејли лажно демантирала дека го изневерила својот сопруг кога била обвинета за две вонбрачни афери во 2008 година. Кога била во кампања за гувернерка на Јужна Каролина, таа објавила дека му е „стоотстотно верна“ на својот сопруг Мајкл Хејли, со кого била во брак 28 години и со кого има две деца. Таблоидот, меѓутоа, тврди дека Вил Фолкс и Лери Марчант во 2010 година потпишале изјава под заклетва дека биле во сексуална врска со Хејли.

Извештаите се толкуваат како притисок врз Хејли спроти изборите во Њу Хемпшир, откако на првото гласање во Ајова таа неочекувано освои помалку гласови од Рон Десантис. Убедливо на првото место во Ајова беше поранешниот претседател Доналд Трамп, но тој може да биде дисквалификуван од претседателската трка ако судовите го прогласат виновен за поттикнување бунт.