Нигериската влада го забрани извозот на сурови шеа ореви – клучна состојка во многу козметички производи, во обид да ја претвори земјата во глобален снабдувач на рафиниран шеа путер и други состојки за нега на кожата, пишува Асошиејтед Прес. Забраната за извоз на јаткасти плодови ќе стапи на сила веднаш и ќе биде во сила шест месеци, по што ограничувањата ќе бидат преиспитани, изјави во четврток Кашим Шетима, потпретседател на земјата. Нигерија го следи примерот на другите западноафрикански земји, вклучувајќи ги Буркина Фасо, Мали, Того, Брегот на Слоновата Коска и Гана, кои го забранија или ограничија извозот во последните две години.

„Забраната ќе ја трансформира Нигерија од извозник на сурови шеа ореви во глобален снабдувач на рафиниран шеа путер, масло и други деривати“, рече Шетима.

Тој додаде дека одлуката не е „анти-трговска мерка, туку политика за додавање вредност дизајнирана да обезбеди суровини за нашите погони за преработка“ и да ги зголеми приходите и работните места во земјоделството. Суровите шеа ореви се мелат и преработуваат за да се произведе шеа путер, клучна состојка во производи како што се лосиони, шампони, регенератори и хидратантни креми.

„Тоа е еден од најважните основи за нега на кожата, особено сега кога многу луѓе се свртуваат кон нетоксични производи за нега на кожата“, рече Заинаб Башир, дерматолог во главниот град на земјата, Абуџа.

Иако Нигерија снабдува 40 проценти од светската понуда на оваа култура, земјата држи само 1 процент од глобалниот пазар на путер од шеа, проценет на 6,5 милијарди долари, според бројките објавени од потпретседателот. Службениците изјавија дека забраната за извоз, доколку остане на сила, се очекува да генерира економски придобивки од 300 милиони долари на краток рок и 3 милијарди долари до 2027 година, пренесува БТА.