Вчерашниот избор на Ирина Трајкоска Стрезоски за директорка на Академијата за судии и обвинители наиде на реакции од јавноста кои се однесуваат на транспарентноста на процедурата, но тој отвори дилеми и за евентуални политички лобирања. Новата директорка, во изјава за Телма, потврдила дека заменик-министерката за екологија и поранешна пратеничка од ВМРО-ДПМНЕ, Ане Лашкоска, ѝ е другарка, но исклучува влијание на нивниот приватен однос врз нејзиниот избор.

„Политичка припадност врз основа на приватни фотографии во овој момент не треба да се утврдува. Ние сме другарки цел живот и пред таа да биде во политика, а ќе останеме и во иднина. Нема влијание од мојата другарка врз било кој да гласа за мене. На таа тема не сме ни разговарале. Се надевам дека ќе ја оправдам довербата што ми беше дадена со изборот од страна на Управниот одбор. Навистина ме радува интересот и на медиумуте за Академијата и верувам дека со мојата работа и достапноста особено за вас новинарите ќе придонесеме за унапредување на транспрентноста на Академијата“, вели Ирина Трајкоска Стрезоски, нова директорка на АСЈО.

Трајкоска Стрезоски завршила во Академијата во 2009 година, по што е избрана во прилепското Основно обвинителство, за четири години подоцна, во 2013-тата, да биде унапредена во Вишото обвинителство во Битола.