Министерството за образование и наука и Бирото за развој на образованието деновиве ќе одлучат од кои учебници ќе учат седмоодделенците од следната учебна година, бидејќи до 1 септември нема да можат да се отпечатат нови кои ќе бидат во согласност со Концепцијата за основно образование.

– И да имаме волшебно стапче, до септември како Влада не можеме да стигнеме да обезбедиме учебници за 7 одделение. Иако во јавноста беше соопштено дека учебници за седмо одделение ќе има, фактичката состојба е друга. Ниту еден учебник не е даден на печатење, а не само што нe се дадени во печат, огромен број не се одобрени, некои не се ниту напишани, а други пак не поминале рецензија – изјави министерката за образование и наука, Весна Јаневска.

Министерката пред отворањето на конференција за инклузивно образование организирана од Комисијата за спречување и заштита од дискриминација појасни дека веќе неколку дена во тек се разговори со Бирото за развој на образованието за да се надмине овој проблем.

На прашањето дали МОН ќе се откаже од етапната програма за седмо, осмо и деветто одделение, Јаневска изјави дека и оваа година децата треба да учат од старите учебници, со тоа што треба да се провери дали тие одговараат на наставните програми.

– Доколку Законот не дозволува, за одреден период ќе биде одложена примената на Концепцијата за преостанатите одделенија – седмо, осмо и деветто – изјави Јаневска.

Од БРО сметаат дека учебниците се прилично компатибилни, освен за две до три теми за кои ќе биде подготвена наставна програма.

Таа додаде дека наставниците ќе треба да бидат спремни да им ги предаваат темите со тоа што ќе обезбедат одредени наставни материјали од кои децата ќе учат, да им посочат друга литература.

– Мене ми е многу жал, но во Македонија ниту учениците, ниту наставниците се спремни да работат комплетно без учебници. Но, не е така страшно затоа што некои земји од Западот, на пример Шведска, кои користеле само дигитални учебници или воопшто не користеле, увиделе дека е потребно да им се вратат учебниците на децата од многу причини – заклучи министерката.