Организациите за човекови права и имиграциски права поднесоа тужба во САД против администрацијата на претседателот Доналд Трамп со цел да се обезбеди пристап до мигрантите приведени во американската воена база во заливот Гвантанамо, Куба, се вели во соопштението за печатот објавено во средата.

Доналд Трамп, кој започна широка антиимиграциска офанзива неколку часа по враќањето во Белата куќа, објави минатата недела шокантен план за изградба на огромен центар за имиграција, со 30.000 места, во Гвантанамо, каде што се наоѓа озлогласениот затвор во кој се префрлени осомничените за „тероризам“ по нападите на 11 септември 2001 година.

Американската унија за граѓански слободи (ACLU), Центарот за уставни права (CCR) и Меѓународната програма за помош на имигрантите (IRAP) ја поднесоа тужбата во име на различни организации и поединци, вклучително и роднини на имигрантите притворени во Гвантанамо и четири организации за правна помош.

„Со испраќање имигранти на остров, далеку од адвокатите, (нивните) семејства и остатокот од светот, администрацијата на Трамп покажува дека владеењето на правото ништо не ѝ значи“, рече Ли Гелард, портпарол на ACLU, во соопштението за печат издадено од организацијата.

Организациите особено критикуваат дека администрацијата на Трамп не дала никакви информации за времетраењето на притворот на имигрантите во Гвантанамо, условите, па дури и дали тие ќе можат да комуницираат со нивните семејства и адвокати.

Републиканецот ветува дека ќе испрати „криминалци“ во Гвантанамо. Неговата влада ги дефинира „криминалците“ како лица кои се осудени од судовите за кривични случаи, како и луѓе кои едноставно влегле во САД без виза или дозвола.

„Затворањето на имигрантите во Гвантанамо се заканува да создаде опасен преседан“, врз основа на кој „американската влада ќе може систематски да ги префрла барателите на азил во офшор објекти“, истакна Хавиер Идалго, правен директор на организацијата RAICES.

Американскиот претседател вели дека сака да префрли „криминалци-рецидивисти“, вклучително и американски државјани, во други земји, на пример во Ел Салвадор, чиј претседател Најиб Букеле понуди да ги пречека Американците и неАмериканците во затворите во неговата земја за одредена сума. Меѓутоа, такво нешто секако би било оспорено преку правна постапка.