Израелскиот премиер Бенјамин Нетанјаху денеска изјави дека создавањето палестинска држава го загрозува постоењето на Израел и вети дека ќе се бори против таквите повици пред Генералното собрание на ОН.

-Ќе треба да се бориме, и пред ОН и во сите други арени, против лажната пропаганда насочена кон нас и против повиците за палестинска држава, кои би го загрозиле нашето постоење и би служело како апсурдна награда за тероризам, рече Нетанјаху.

Велика Британија денеска ја призна палестинската држава откако Израел не ги испочитува условите поставени во јули од премиерот Кир Стармер, вклучувајќи прекин на огнот.

И Канада и Австралија денеска и формално ја признаа палестинската држава, а се очекува и други земји да го сторат тоа оваа недела на Генералното собрание на Обединетите нации. Ова веќе го најавија Франција, Луксембург и Португалија.
По признавањето на палестинската држава од страна на Велика Британија, Канада и Австралија, израелскиот екстремно десничарски министер за национална безбедност Итамар Бен-Гвир повика на итна анексија на Западниот Брег.