Британската манекенка Кара Делевињ (31) го запознала американскиот рок-музичар Брус Спрингстин (74) на фестивалот „Гластонбери“ и, како што откри самата, немала поим кој е тој.

Во интервју за „Сандеј тајмс“, манекенката раскажа дека нејзината девојка Леа Мејсон (31) била пресреќна кога го запознале Спрингстин на „Гластонбери“ пред две години, а Делевињ не знаела кој е тој.

„Учиме многу работи една од друга. Пред две години, ние бевме зад сцената на ‘Гластонбери’ и се фотографиравме со еден тип. Потоа ја прашав Леа: ‘Кој беше тоа?’“, раскажува манекенката.

Испаднало дека „типот“ е легендарниот рокер, кој исто така настапи на фестивалот таа година.

„Јас само ѝ реков: Што? Тоа беше Брус Спрингстин? Немав поим како изгледа“, изјави Делевињ.

Во интервјуто, Делевињ сподели дека таа и нејзината девојка сакаат заедно да одат на концерти и фестивали и покрај тоа што имаат различни музички вкусови.

„Леа сака стар рок, додека јас сакам ар-ен-би и хип-хоп“, вели манекенката.

Манекенката откри дека во иднина планираат да одат на концертите на Тејлор Свифт, „Грлс араунд“, Роби Вилијамс и Стиви Никс.

Во интервју за „Вог“ во 2023 година, Делевињ откри дека таа и Мејсон се запознале кога биле сè уште деца, поточно во интернат во Хемпшир, Англија. Тие повторно се сретнаа по повеќе од десет години, на концерт на Аланис Морисет.