Перу стана првата земја во светот што воведе фиксна старосна граница за обновување на возачки дозволи. Според новата регулатива издадена од Министерството за транспорт и врски (MTC), лицата над 80 години повеќе нема да имаат право да ја обноват својата возачка дозвола. Новите правила предизвикаа силни реакции и јавна дебата во земјата, но властите нагласуваат дека целта е да се зголеми безбедноста во сообраќајот, особено со оглед на физичките и когнитивните промени што доаѓаат со возраста.

За постарите лица на возраст од 70 до 80 години, возачката дозвола ќе биде продолжена со задолжителни медицински прегледи, вклучувајќи:

Тестови за вид и слух, мерење на крвен притисок, проверка на когнитивните функции, а исто така, дозволите ќе важат пократок временски период, што значи дека постарите возачи ќе мора почесто да се подложуваат на здравствени прегледи.

Новата мерка прави разлика помеѓу професионални и непрофесионални возачи, но построги услови важат за сите. Иако на многумина им се чини дека станува збор за дискриминаторска практика, властите велат дека тоа е „неопходен одговор на демографските промени“. Интересно е што слична иницијатива беше разгледана во Европската Унија, но беше одбиена бидејќи фиксната возрасна граница може да ги загрози основните права на граѓаните и да биде правно оспорена.