Англиските фудбалски екипи потрошија дури 1.1 милијарди фунти на трансфери за време на летниот преоден рок кој заврши вчера на полноќ. Оваа сума е за 11 проценти помала од минатото лето кога 20 екипи кои настапуваат во Премиер лигата потрошија 1.3 милијарди фунти.

Според податоците на ревизорската компанија „Делојт“ ова е најмала колективна потрошувачка на екипите од Премиер лигата од 2015 година и прв пат да е забележен пад од глобалната економска криза која го зафати светот помеѓу 2008 и 2010 година, пренесува Би-Би-Си.

Во последниот ден од предниот рок, премиерлигашите потрошија 150 милиони фунти и шеста година по ред ја надминуваат бројката од милијарда фунти дадени за засилувања. Ова лето беа донесени 148 фудбалери, додека минатата година беа направени 132 трансфери, а во 2019 година таа бројка изнесуваше 128.

Што се однесува до останатите најсилни лиги во Европа, Бундеслигата е единствената лига од „големата петорка“ која потроши повеќе пари во однос на минатата година.
Втори најголеми трошаџии ова лето беа екипите од Серија А кои потрошија 475 милиони фунти за засилувања.

Двата најголеми трансфери ги реализираа Манчестер сити и Челси. „Граѓаните“ и платија 100 милиони фунти на Астон Вила за Џек Грилиш, додека Челси потроши 97.5 милиони фунти за да го врати Ромелу Лукаку на „Стемфорд бриџ“. Третиот најголем трансфер го направи Манчестер јунајтед кој за да го донесе Џејдон Санчо од Борусија Дортмунд плати 73 милиони фунти.