Кој е виновен за пожарот во модуларната болница, роднините на починатите нема да добијат одговор преку ова обвинение, вината меѓу другото треба да се бара во електричната инсталација, која е несоодветно поставена, но и во изолацијата на самиот објект, а не во тоа дали или немало ПП апрати, посочи одбраната на првообвинетиот Флорим Бесими, кој се товари за кривично дело тешки дела против општата сигурност.

„Флорим Бесими како директор на болницата немал ниту обврска да поставува ПП апарати, тој бил задолжен за квалитетот на услугите, организацијата на болницата и слично. Но и дел од сведоците кои сведочеа дека не виделе ПП апарати кога избувнал пожарот не биле во другите соби или во некои други простории да видат дали имало противпожарна заштита, туку биле затечени само во собите на нивните роднини. Затоа на судот не му останува ништо друго освен да донесе ослободителна пресуда“, истакна обраната на Флорим Бесими.

Одбраната на второобвинетиот Артан Етеми посочи дека се работи за несериозно обвинение без правна тежина.

„Обвинетиот не се терети за предизвикување на пожар туку за други кривично дело. Би сакал да потенцирам дека станува збор за пожар во полуфабрикувани контејнери. Бараме обвинетиот да се ослободи за делото кое се товари, а кое истото Јавното обвинителство не го докажа“, изјави одбраната на второобвинетиот Артан Етеми.

Основниот суд Тетово од доказите може да утврди дека во модуларната болница имало ПП апарати, посочи во завршните зборови одбраната на правното лице „Клиничка болница Тетово“ кое се товари за кривични дела предизвикување на општа опасност и непостапување според здравствени прописи за време на епидемија.

„Дел од вработените кои биле во повеќе простории во своите искази, посочија дека во просториите на модуларната болница виделе ПП апарати и тие докази треба да се земат во предвид како веродостојни, за разлика од другите сведоци кои кажаа дека немало ПП апарати, но тие биле присутни во болницата во одредени случаи и само во некои простории. Обвинителството не успеа да докаже дали доколку имало ПП апарати, пожарот ќе се изгасил. Луѓето во модуларната влегувале да ги посетат роднините самоволно, а од вработените им било укажувано да го напуштат објектот“, посочи во завршните зборови одбраната на правното лице Клиничка болница Тетово.

И одбраната на доктор Бобан Вучевски кој се товари за кривично дело непостапување според здравствени прописи за време на епидемија, побара ослободителна пресуда оти Јавното обвинетелство како што истакна не успеало да докаже вина на докторот.

Од Јавното обвинителство, велат дека обвиненијата со кои се товарат обвинетите се докажани во судскиот процес.

„Сведоци сведочеа дека ноќта кога избувнал пожарот сакале да интервенираат, но не можеле да најдат ПП апарати. Дел од вработените истакнаа дека доктор Бобан Вучевски бил раководител на модуларната, тој им давал наредби, а роднини на пациенти слободно влегувале во болницата. Исто и увидот на ДЗС докажа дека на лице место не се најдени ПП апарати. Затоа бараме судот да ги прогласи за виновни и да се земат во предвид олеснителните и отежнителните околности, посочи во завршните зборови Јавното обвинителство.

За време на завршните зборови, законски застапници на дел од роднините на починатите побараат надомест на штета и кажаа дека се приклучуваат на кривичниот прогон.

Пред денешното рочиште и утринава имаше собир за поддршка на доктор Бобан Вучевски.

Докторот беше достапен за пациентите 24 часа, наместо да биде награден, тој излезе како жртва, велат тетовци. Посочија дека вината за пожарот треба да се бара на друго место.

Во пожарот во модуларната болница на 8 септември 2021 година загинаа 14 луѓе. Во октомври 2021 година, по вештачењето на МВР, Обвинителството информираше дека пожарот во модуларната, настанал како последица на запален продолжен кабел, на кој бил приклучен апарат за реанимација.

Пресудата за случајот ќе биде објавена во понеделник на 5 јуни.