Познатата пејачка Неда Украден ја реализираше својата визија за луксуз и дом во срцето на Далмација. На земјиштето до родната куќа во близина на Имотски, Неда изградила луксузна вила која овозможува семејна атмосфера во раскошната оаза, што ја прави врвна туристичка понуда. Иако првично беше замислена како место за семејни собири, овој имот сега привлекува и туристи со подлабок џеб, кои се подготвени да издвојат значителна сума за да уживаат во ова бајковито здание.

Вилата се изнајмува преку хрватска агенција, а цените за изнајмување започнуваат од 2.377 евра за ноќ, во зависност од сезоната и должината на престојот. И покрај високите цени, интересот за овој ексклузивен имот не стивнува, бидејќи нуди сè што е потребно за луксузен одмор, пренесува Нет.хр.

На гостите им се достапни пет спални соби, бесплатен сопствен паркинг и гаража, а куќата е опремена со машина за перење, кафемат и микробранова печка. Има и елегантно уредени дневни соби, извонредно опремени кујни, бањи со кади и тушеви, како и велнес центар со када за хидромасажа, сауна и загреан базен. Посебен шарм на вилата ѝ даваат терасите со лежалки, кујната во градината со скара и малото игралиште за деца.

Иако оваа луксузна вила ги нуди сите услови за релаксација, Неда постави строги правила за гостите. Вилата е наменета за непушачи, не се дозволени домашни миленици, а строго се забранети собири на млади или бучни забави. За резервација е потребен депозит од 500 евра, а уплатата се врши однапред.

Сместена во мирна средина, вилата е на само половина час возење од прекрасните плажи на Макарска ривиера.