На Агенцијата за управување со одземен имот и е познато дека се одземени обврзници, според она што го соопшти Директорот на Царинската управа, но оваа информација не e добиена на формален начин и до овој момент не се предадени обврзниците, изјави за „Слободен печат“ Дритон Небиу, директор на Агенција за управување со одземен имот.

Вчера, директорот на Царинската управа Стефан Богоев рече дека се запленети обврзници во вредност од 92 милиони долари од страна на турски државјанин кој бил фатен со обврзниците на скопскиот аеродром, а кој доаѓал од Истанбул. Тој најави дека обврзниците ќе бидат предадени во Агенцијата за управување со одземен имот.

Небиу вели дека Агенцијата за прв пат се соочува со конфискување на обврзници.

– Она што е многу важно, а не го знаеме, е дали станува збор за домашни обврзници, издадени од домашна институција, или за странски обврзници, издадени од странска институција. Но, Агенцијата – согласно законските прописи, зависно од видот и карактерот на обврзницата и согласно материјалните закони по кои постапуваме и по законите на РСМ кои го регулираат прашањето на обврзниците – ќе ги преземе правните дејствија во насока на законитото спроведување на конфискацијата, а сето тоа во насока на преземени дејствија за располагање, управување и продажба на обврзниците – изјави Небиу.

Тој вели дека во оваа фаза Агенцијата има ограничени податоци, но по нивната конфискација, кога ќе имаат повеќе податоци кои ќе ги споделиме со јавноста.