Скопјани и жители на повеќе градови во Македонија вечерва се гушат. Густата магла со штетните концетрации на честитки формираа смог поради кој граѓаните не можат прозорец да отворат, а ретко кој се осмелува да излезе од дома.

Главниот град вечерва повторно е меѓу најзагадените градови во светот, а прв во Европа. Ова го покажуваат податоците на платформата за следње на воздухот „IQAir“. Вредноста на индексот на загадување е 163, главно заради концентрациите на ПМ 2,5 честичките, кои се над 14 пати повисоки од препораките на Светската здравствена организација. Воздухот се оценува како нездрав, а препораките се да не се спортува надвор, да се носи маска, а во затворениот простор да работат прочистувачите на воздух.

Освен исклучително ниво на загаденост, маглата предизвикува опасност и за нормалното одвивање на сообраќајот, како во Скопје така и на патиштата низ државата.

Според АМСМ, намалена видливост поради магла од 50 до100 м има во Охрид, Д. Капија, Петровец – Велес и Велес – Штип. Интензитетот на сообраќај на патните правци надвор од градските средини е умерен. На државните патишта се одвива во зимски услови, наместа по влажни коловози. АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Од АМСМ потсетуваат и на законската обврска за задолжително поседување зимска опрема во возилата, без оглед на моменталната временска состојба. Според нивните информации, на граничните премини од македонска страна нема подолги задржувања за влез и излез од државата.