Евакуиран е и последниот станар во зградата во којашто вечерва изгореа два стана на улицата „Широк дол” во Штип.

Командирот на Територијалната противпожарна единица од Штип, Дарко Коцев, за МИА вели дека извлекувањето на последниот станар е извршено со помош на полицијата, бидејќи не сакал да излезе од својот дом.

Пожарникарите и полицијата сѐ уште се пред зградата, во која пожарот одамна е изгаснат, а претходно беа евакуирани сите станари. Струјата во зградата е исклучена, а полицијата треба да изврши увид, кој ќе ги утврди причините за пожарот.

Огнот избувнал во стан во кој немало струја. Според соседите, ова не е првпат да се пали овој стан, а тие се сомневаат дека пожарот настанал од запалена свеќа.