Тениската федерација на САД (УСТА) и челниците на АТП и ВТА објавија дека на овогодинешниот УС Опен и на седум од деветте турнири кои ќе се играат во САД нема да има линиски судии, туку таа работа ќе ја извршува видео технологијата.
Како што е објавено, хок-ај системот „соколово око“  ќе работи на седум од турнири и на УС Опен.
УСТА овој систем го тестираше минатата година, односно немаше линиски судии на УС Опен, освен на двата главни терени „Артур Еш“ и „Луј Армстронг“.

Минатата година на УС Опен се случи инцидент во кој „главни актери“ беа Новак Ѓоковиќ и линиска судијка. Имено, во дуелот од четвртото коло помеѓу Ѓоковиќ и Шпанецот Пабло Карењо Буста, српскиот тенисер случајно ја погоди линиската судијка во врат по што го загуби гемот, а потоа и беше дисквалификуван.
Овогодинешното издание на УС Опен е предвидено да започне на 30. август, а титулата ќе ја брани Доминик Тим.