Апсолутно е непотребно да се крева паника ако сте се напиле од млекото „Милкано“, кое беше повлечено од пазарот поради присуство на афлатоксин, истакнува за „Слободен печат“, професор Нико Беќаровски, доктор по токсикологија, посочувајќи дека за загрозување на здравјето треба да се внесат големи количества контаминирано млеко. Сепак, тој потенцира дека е добро што имаме лаборатории кои може да го детектираат овој токсин, а ја поздравува и молневитата реакција од трговците, кои веднаш ја повлекоа спорната пратка. Професор Беќаровски вели дека на неговата клиника никој не побарал лекарска помош, меѓутоа добил повеќе телефонски повици од граѓани со дилема – дали се во опасност ако се напиле од спорното млеко и дали да го фрлат купеното пакување?

-Апсолутно е непотребна да се драматизира и да се трча по доктори. Имаме добри лаборатории, одлична е брзата реакција на трговците – дециден е Беќаровски.

Меѓудругото, тој прашува, дали некој ја знае детектираната концентрацијата на афлатоксин во „жигосаното“ млеко?

-Дали воопшто е одредена концентрација на афлатоксин Б1 (AФБ1), бидејќи реално тој може да предизвика оштетување на црниот дроб, доколку се внесе во екстремно високи дози или при долготрајно хронично изложување. Афлатоксинот е термолабилен и при вриење на млекото се уништува. За 33 години клиничка пракса не сум имал ниту еден пациент, со акутна црнодробна лезија, предизвикана од внес на афлатоксин. Немојте воопшто да паничите ако сте се напиле од млекото кое е повлечено од употреба и да трчате по доктори – додава Беќаровски.

Според токсилогот, реално опасноста од акутно труење може да биде предизвикана ако некој касне мувла, но хронично, според светските студии афлатоксинот е канцероген.

Поради присуство на афлатоксин, во понеделникот од продавниците на трговскиот синџир „Стокомак“ беше повлечен еден лот од босанското УХТ млеко „Милкано“ со 3,2 отсто масленост. Регионот памети слична ситуација и во 2013 година, кога одредени видови на млеко од хрватските производители „Дукат“ и „Виндија“ беа повлечени од Хрватска и Црна Гора, бидејќи во нив беше најдено присуство на афлатоксин, а БИХ го забрани нивниот увоз.

Експертите велат дека присуството на афлатоксин е индикатор за нехигиенските услови во кои се чуваат домашните животни, пред се свињите и кравите. Инаку, тие силни отрови доспеваат во животинското ткиво и во нивните производи преку затруената храна, бидејќи се стабилни и не може да се уништат дури и термички. За потсетување, поради присуството на токсини во свинското месо, Романија во процесот на пристапување во ЕУ, мораше да ги затвори големите свињарски фарми, а свињите да ги продаде. Странските експерти предупредуваат дека лесно може да се најде присуство на овој токсин и во продавниците за здрава храна, кои нудат рефус стока, бидејќи во неа има габи од кои некои лачат и афлатоксин.

Задолжително фрлете го мувлосаниот мармалад!

Афлатоксините се група на микотоксини, кои преставуваат група на отровни природни соединенија. Тоа се силни отрови и се јавуваат на места кои се погодни за размножување на габите. Или може да се најдат практично на сите места или предмети со кои луѓето секојдневно доаѓаат во допир: разни семиња, житарици, термички неправилно обработен мармалад, бајат леб и брашно, мувлосани ѕидови, подруми, односно секаде каде што има влага и органски материи, нечистотија (кујни и бањи). Најотровен природен мутаген е афлатоксинот Б1, кој директно ја нарушува структурата на ДНК, доведувајќи до мутации кои можат да бидат смртоносни.

Во Србија и во Македонија дозволената концентрација на афлатоксинот во млекото е 0,05 микрограми на еден килограм, во ЕУ е 0,025, а во Унгарија е 0.

Според ЕК во Македонија храната е безбедна

Европската комисија во својот најнов извештај нотира дека „Северна Македонија има добро ниво на подготовка во безбедноста на храната, ветеринарната и фитосанитарната политика.

-Оперативни се Националниот систем за брзо предупредување за храна и добиточна храна, како и системите за внатрешна ревизија и обука на Агенцијата за храна и ветеринарство. Агенцијата презеде мерки за заштита на граѓаните преку решавање на поплаките на потрошувачите. Законодавството беше усогласено со ЕУ за адитиви во храната, материјали кои се во контакт со храна и максимални нивоа за одредени загадувачи во прехранбените производи. Агенцијата ја продолжи програмата за следење на безбедноста на храната, но податоците треба дополнително да се анализираат – се вели во извештајот.