Не можеме да ги контролираме безбедносните служби – не ни издаваат сертификати, велат од ВМРО-ДПМНЕ
„Нема да дознаеме кој е одговорен за случајот Онишченко и тоа е проблемот на овој безбедносен сектор – се направи реформа на хартија, но реално надлежните не работат како што треба. Ние баравме да видиме дали институциите имаат капацитет да се справат со вакви ситуации”, рече пратеникот Бране Петрушевски од ВМРО-ДПМНЕ вечерва во гостувањето во емисијата „Топ тема“ на „Телма“.
Препорачано
Петрушевски укажа дека се сѐ сведува на системска аномалија за да се избегне одговорност.
„Можеби надлежните биле свесни за недостатокот и го користеле. Оттука, може повторно да ни се повторуваат исти или слични вакви случаи”, рече Петрушевски.
Според него, треба да има одговорност, но дополнително е спорно што директорот на АНБ не ја понесе одговорност, а мандатот му истече. Дополнително, рече Петрушевски, проблем е што „се кријат информации под превезот дека се државна тајна“.
„Има и политика во издавање на сертификатите или кога одговара се издаваат брзо, а кога не се одолговлекува. Еве за мене како пратеник-член на таа специфична Комисија за надзор на АНБ и Агенцијата за разузнавање, беше одолговлекувано издавање на сертификатот. Најдолго во месец дена треба да се издаде, но тоа не се случи и оправдување од сега веќе поранешниот директор беше дека имал многу работа”, посочи Петрушевски.
Пратеникот укажа на тоа дека како пратеници не можат да ја вршат улогата на контролори на АНБ и Агенцијата за разузнавање. Петрушевски се осврна и на дојавите на бомби кои се случуваат веќе неколку месеци.
„Седницата за дојавите за бомби беше свикана на барање на нас, опозициските пратеници бидејќи веќе неколку месеци чекаме нашите безбедносни сектори да се справат со ваквите предизвици. Веќе неколку месеци ништо не се случува и откако почна веќе во јавноста да се шпекулира со разно разни информации кој е дојавувачот на бомби, откако паниката стануваше се поголема во јавност бидејќи сепак се малтретираат малолетни лица, деца од училишта и поголема е сензитивноста кај родителите по една ваква работа, ние побаравме седница на која што ќе расправаме”, рече Петрушевски.
