Иранскиот претседател Масуд Песекијан вети дека Иран ќе го надмине секое повторно воведување санкции преку таканаречен механизам „snapback“, откако Советот за безбедност на ОН гласаше против трајно укинување на санкциите врз Техеран.

„Со „snapback“ тие го блокираат патот, но мозоците и мислите се тие што го отвораат или градат патот“, рече Песекијан во говор емитуван на државната телевизија.

„Тие не можат да нè спречат. Можат да го нападнат нашиот Натанц или Фордоу (нуклеарни објекти нападнати од САД и Израел во јуни), но не се свесни дека луѓето го изградија и ќе го обноват Натанц“, рече Песекијан.

Одлука на Советот за безбедност
Одлуката на Советот за безбедност дојде во петок откако Велика Британија, Франција и Германија минатиот месец започнаа 30-дневен процес за повторно воведување санкции, обвинувајќи го Техеран дека не се придржува до договорот од 2015 година со светските сили, чија цел беше спречување на развојот на нуклеарно оружје.

Иран негира каква било таква намера.

„Никогаш нема да се предадеме на прекумерни барања бидејќи имаме моќ да ја промениме ситуацијата“, го цитираа државните медиуми Пезекијан.

Последици од санкциите
Санкциите на ОН би можеле повторно да се воведат врз Иран, освен ако не се постигне договор за одложување меѓу Техеран и клучните европски сили во рок од околу една недела.

Со него повторно би се вовело ембарго за оружје, забрана за збогатување и преработка на ураниум, забрана за активности со нуклеарни балистички ракети, глобално замрзнување на средствата и забрана за патување на ирански поединци и субјекти.