Министерот за правда Никола Тупанчески во вечерашната емисија „Топ тема“ на телевизијата „Телма“ рече дека не е исклучена можноста истрагата за бегството на осудениот убиец Беким Мемети да резултира со уште разрешувања на директори, меѓу кои и на директорот на затворот „Идризово“, Шпенд Тахири.

На вчерашната седница, Владата веќе го разреши директорот на Управата за извршување санкции, Марјан Спасовски, а на денешната – назначи вршител на должноста, старо-новиот директор Јовица Стојановиќ.

Според Тупанчески, се разгледувале „сите варијанти за барање одговорност по вертикална линија“.

„Не значи дека тука е завршена целата работа, едноставно треба да се откријат, да се стигне до докази кој сѐ е инволвиран во оваа работа, дури и формациски. Може да нема директно влијание или директни ингеренции во однос на случувањата, меѓутоа дефинитивно, понекогаш треба да се понесе одговорност и во формално-правна смисла на зборот, односно формациски“, рече Тупанчески.

Запрашан за тоа дали Владата оценила дека одговорноста на Тахири е помала од таа на Спасовски, Тупанчески одговори дека не станува збор за оценување на поголема или помала одговорност, затоа што одговорноста би требало да биде по вертикална линија, од првиот до последниот, а тоа треба да го покаже истрагата.

Според министерот, нема сомнеж дека бегството на Мемети било добро организирана акција, што бара исто толку добро организирана реакција од страна на државните органи.

„Станува збор за промптно реагирање од страна на Управата за извршување на санкции, со спроведувањето на вонредниот стручен надзор. Тоа значеше суспендирање на сите, првично што изгледа дека се вклучени во однос на овој немил настан. Втора работа, којашто исто така треба да се подвлече, е дека во меѓувреме, за истите тие лица веќе е определена мерка притвор и тие се суспендирани од своите работни места. Третата работа или сегмент којшто е комплементарен на претходните, е дека е распишана од страна на МВР меѓународна потерница за лицето коешто е во бегство. И четврта работа, треба да се посочи дека и органите на прогонот, вклучувајќи го и ОЈО за организиран криминал, учествуваа во откривањето на сите докази поврзани со овој настан. Така што, ако ги земете овие неколку сегменти коишто ги набројав во моментов, реакцијата е иницијална, меѓутоа тоа не значи дека тука ќе застане, затоа што очекувањата се дека овој кривично-правен настан има и одредени работи коишто допрва треба да се истражуваат“, рече Тупанчески.