Народната банка објави дека електронските плаќања значително поевтинуваат и за граѓаните и за компаниите. Причина за тоа е намалувањето на трошоците за користење на Македонскиот интербанкарски платен систем – МИПС и ревизијата на тарифниците од страна на банките.

За граѓаните, надоместоците за плаќањата преку МИПС се намалени во просек за околу 50 отсто, а во најголемиот дел од банките интерните електронски плаќања станаа бесплатни. Кај компаниите, електронските трансакции преку МИПС се поевтини за околу 30 проценти, додека интерните електронски плаќања за околу 55 отсто.

Банките преминуваат кон поевтини и фиксни надоместоци по трансакција, независно од износот на уплатата. Новите цени веќе важат кај дел од банките, а останатите ќе ги воведат најдоцна до октомври.

Според Народната банка, поевтините услуги треба да го поттикнат користењето на електронските плаќања, да ја зголемат довербата во банкарскиот систем и да придонесат кон побрза дигитализација на платниот промет.