Зелениот картон останува неопходен документ за влез со моторни возила во европските и соседните земји, како што се Србија, Албанија, Црна Гора, БиХ и Молдавија. Од Националното биро за осигурување (НБО) истакнуваат дека не треба да се создава конфузија кај сопствениците на возила, бидејќи во моментов зелениот картон е функционален, а неизвесно е дали и кога би можеле да се воведат промени во неговата примена.

Од Националното Биро за осигурување истакнуваат дека тоа e комплексно прашање коешто не може да се регулира поединечно туку генерално и да важи за сите.

А измените околу зелената карта зависат од:

• Внатрешните одредби и Интерните регулативи (IR) на Советот на Бироа – Брисел
• Законот за Задолжително осигурување во сообраќајот
• Склучените билатерални договори помеѓу Националните Бироа во регионот и пошироко
• Имплементираниот Тарифен систем и Правилниците на НБО (Национално Биро за осигурување) за обработка и плаќање на штети по ЗК според Внатрешните одреби на Советот на Бироа-Брисел

Точно е дека во CEFTA Секретаријатот е отворено прашањето за некакви промени околу ЗК, но станува збор само за еднострано мислење и видување на начинот и потребата од користење односно некористење на ЗК како документ за влез со моторни возила во државите од CEFTA.

Непрактичноста на идејата за укинување на ЗК само за државите од CEFTA е дотолку повеќе што граѓаните пак ќе користат ЗК за влез во било која друга држава членка на ЕУ и потписнички на Мултилатералната спогодба одобрена од Советот на Бироа-Брисел – се вели во соопштението од НБО.

Останува во иднина отворено прашањето за комплексноста на ЗК, неговото укинување со вклучување на премијата од ЗК, врз основа на актуарски пресметки во премијата на полисата за АО, со што се создаваат можности за вклучување на ЗК во таканаречената Мултилатерална спогодба поддржана од Советот на Бироа – Брисел и немањето на потреба од користење на Зелена Карта во сите европски држави па и во државите од CEFTA процесот.