Демократската унија за интеграција (ДУИ) реагира на одлуката на Владата за именување на Петар Богојески за раководител на Агенцијата за европски образовни фондови. Од ДУИ велат дека институцијата треба да има за цел да ги приближува младите кон европските вредности, а не да ги навредува и понижува.

-Именувањето на човек кој целата своја јавна и политичка кариера ја изгради со навреди и омаловажување кон Албанците, претставува директна провокација не само за Албанците во Северна Македонија, туку и за самата европска идеја во земјава. Посебно иронично и трагично е тоа што истиот овој поединец беше предмет на кривична пријава токму од партиите на Вреди во Владата – а денес, со нивна поддршка, е награден со водечка функција – се вели во соопштението.

Овој чин, од ДУИ велат дека е јасен сигнал дека навредите кон Албанците не само што не се санкционираат, туку и се наградуваат со државни позиции.

-Тоа претставува опасна порака дека секој што сака да гради политичка кариера, доволно е да ја понижува албанската заедница. Дополнително, доверувањето на управувањето со европски фондови на човек кој не само што упатувал навредливи пораки до Албанците, туку и до самата Европска унија и нејзините вредности, претставува понижување и за европските партнери и за даночните обврзници на ЕУ, кои ги финансираат овие програми – велат од партијата.

ДУИ повика на итно повлекување на оваа одлука и враќање на сериозноста во процесите што се однесуваат на европската интеграција, образованието и соживотот.