Лидерите на НАТО ја посочуваат Кина како „решавачкиот овозможувач“ на руската инвазија врз Украина и изразуваат „длабока загриженост“ поради „продлабочувањата на врските на Пекинг со Москва“, но и поради зајакнувањето на нуклеарниот арсенал и своите капацитети во вселената.

– Мислам дека пораката што НАТО ја испраќа од овој самит е многу цврста и многу јасна, и ние јасно ја посочуваме одговорноста на Кина, која ја овозможува руската војна – изјави генералниот секретар на НАТО, Јенс Столтенберг.

Во завршното коминике на самитот во Вашингтон, одобрено од лидерите на 32-те членки, од Кина се бара „да ја запре сета материјална и политичка поддршка на руските воени напори“. За Пекинг е наведено дека е „голем поддржувач на руската одбранбена индустриска база“ и се заклучува дека тоа „ја зголемува заканата што Русија ја претставува за своите соседи и за евроатлантската безбедност“. Во текстот Кина се смета одговорна за „злонамерни кибернетски и хибридни активности и сеење дезинформации што ја поткопуваат евроатлантската безбедност. Се изразува загриженост и за „брзиот развој и проширувањето на нуклеарниот арсенал“, со повеќе нуклеарни бојни глави и помодерни проектили како нивни носачи.

Министерството за надворешни работи во Пекинг ги отфрли овие констатации. Канцеларијата на Кина во ЕУ оцени дека самитот на НАТО во Вашингтон е „исполнет со менталитет од времето на Студената војна“ и со „непријателска реторика“.

– Параграфите што се однесуваат на Кина се провокативни, со очигледни лаги и подметнувања – соопшти мисијата.

Пекинг го повика НАТО „да остане подалеку“ од Азиско-пацифичкиот регион, алудирајќи на посебниот самит на лидерите на Австралија, Нов Зеланд, Јапонија и Јужна Кореја, кои беа гости на самитот на Алијансата.

– НАТО продолжува да ја игра меѓусебната врска меѓу безбедноста на Европа и безбедноста во Азија-Пацификот. Ја повикуваме Алијансата да остане во рамките на својата улога како регионална одбранбена организација во северниот дел на Атлантикот. НАТО не треба да стане нарушувач на мирот и стабилноста во Азиско-пацифичкиот регион или алатка што ја користат одредени големи сили за одржување на хегемонијата – се наведува во соопштението.

Кина, од друга страна, испрати свои трупи на заеднички воени вежби со Белорусија, на самата граница со Полска, која е членка на НАТО.

Дени Расел, поранешен американски помошник државен секретар задолжен за Азија, го оцени како „невообичаен чекор“ потегот на НАТО да укаже на заканите од Кина, на самитот што практично целосно беше посветен на војната во Украина и на единството на сојузниците.

– Ова е сведоштво дека пропаднале обидите на Пекинг да седи на две столици, на Русија и на Западна Европа, и колку е шупливо декларирањето неутралност. Обидите на Кина за поделба и освојување всушност ја засилија солидарноста помеѓу главните нации во Евроатлантскиот и во Азиско-пацифичкиот регион – оцени Расел за „Гардијан“.