Деновиве беше распишан јавен тендер за изградба на магистралниот гасовод Босиљево – Сисак. Тендерот го објави Плинакро, оператор на хрватскиот гасоводен систем, а вредноста на зделката е 147 милиони евра. Краен рок за поднесување на понудите е 29.04.2025 година, а треба да биде завршен во 2026 година. Изградбата на магистралниот гасовод Босиљево – Сисак ДН 800/100 е планирана по принципот „клуч на рака“, кој опфаќа градежни работи, машински и монтажни работи, заварувачки работи, електроинструментални работи, катодна заштита, геодетски работи и услуги, испорака и монтажа на сета опрема и материјали, сето тоа во согласност со техничката спецификација.

Рокот за завршување на работите е 14 месеци од почетокот на работата. Новиот хрватски гасовод, кој е и продолжение на неодамна завршениот гасовод Злобин – Босиљево, е затворен технолошки систем изграден од челични цевки со номинален пречник од DN 800, а е димензиониран во согласност со работен притисок од 100 бари. Целата должина се изведува како подземна инсталација, со исклучок на изградба на надземни објекти на местата за инсталација на блокирачки станици, станици за средно чистење и гасни јазли.

Минува низ окрузите Карловац и Сисак-Мославина, низ општините Босиљево, Генералски Стол, Бариловиќ, Крњак, Војниќ, Гвозд и Топушко и градовите Глина, Петриња и Сисак. Гасоводот е поставен во коридорот на постојниот главен нафтовод на JAНАФ, неговата должина е околу 101 км. Гасоводот е продолжение на постојната интерконекција Унгарија – Хрватска (гасовод Варошфелд – Дравашердахели – Доњи Михољац – Слободница), информира Пословни дневник.