Озлогласениот српски наркобос Дарко Шариќ денеска беше првостепено осуден на шест години затвор во постапката против него и неговите соработници за планирање на убиството и дискредитацијата на сведокот-соработник Небојша Јоксовиќ, пренесе „Н1“.

На Шариќ денеска му беше прекинат притворот, каде што се наоѓа откако беше екстрадиран во Србија во март 2014 година, и тој заминува на одлежување на казната од 14 години затвор што претходно ја доби за шверц на речиси шест тони кокаин.

Неговиот поранешен адвокат Дејан Лазаревиќ е осуден на три и пол години затвор со забрана за вршење дејност во период од седум години од правосилноста на пресудата, а полицајците со кои соработувал Шариќ се осудени на три и на две и пол години со забрана за вршење дејност во траење од пет години од правосилноста на пресудата.

Небојша Јоксовиќ, сведок-соработник со Обвинителството, кој, според обвинението, групата на Шариќ планирала да го убие, сведочел против Шариќ, а наркобосот планирал да го убие како одмазда за неговото сведочење.

Пораките на „Скај“ кои Дарко Шариќ ги разменил со тогашниот адвокат Дејан Лазаревиќ откриваат дека адвокатот му предложил на Шариќ Јоксовиќ да биде убиен од снајпер, а Шариќ му рекол дека за тоа ќе обезбеди милион евра.

Со оглед на тоа што таквиот план не се остварил, Шариќ наредил дискредитација на Јоксовиќ. Целта беше со тоа да се изгуби статусот на сведок-соработник поради наводното планирање на убиството на неговиот соработник од Ваљево, Горан Николашевиќ.

Николашевиќ го пријави Јоксовиќ во полиција и го обвини за експлозијата на неговиот автомобил, која се случи на 9 август 2020 година во Ваљево. Обвинителството тврди дека се било наместено и дека експлозивот по претходен договор го поставиле соработниците на Шариќ.

Обвинителството тврди дека сето тоа Дарко Шариќ го договорил со своите соработници преку апликацијата „Скај“ на шифриран телефон додека бил во еден од најчуваните притвори во зградата на Специјалниот суд.