Нападот со нож во јужниот австриски град Вилах, во кој загина тинејџер, а пет лица се повредени, го извршил сириски исламист поврзан со Исламската држава (ИД), изјави денеска австрискиот министер за внатрешни работи Герхард Карнер.

Карнер на прес-конференција рече дека Сириецот е радикализиран на интернет, пренесе Ројтерс.

Полицијата го идентификуваше сторителот на нападот како 23-годишен Сириец кој побарал азил во Австрија.

Медиумите објавија  дека во нападот во саботата бил убиен 14-годишен тинејџер, а напаѓачот кој со нож ги нападнал минувачите е уапсен. Истите извори  објавија и  дека Сириецот имал дозвола за престој во Австрија.

– Беше како хорор филм. Се се случило брзо, се зборува дека едно лице скокнало од автомобилот, а потоа неколку лица побегнале. Нашиот вработен го заклучи ресторанот и ги задржа гостите внатре“, изјави за германските медиуми очевидец, сопственик на ресторан.