Ниту од септември ќе се најде решение за јавниот градски превоз што ќе функционира уште полошо откако ќе се воведе зимскиот возен ред, ниту градот ќе се исчисти од ѓубрето и смрдеата од дивите депонии. Средбата меѓу градоначалничката Данела Арсовска и премиерот Христијан Мицкоски не ги даде посакуваните резултати за скопјани, а и по средбата продолжија меѓусебните обвинувања за тоа кој е виновен што Скопје сега се наоѓа во толку очајна состојба.

По состанокот немаше заедничка прес-конференција, а министерот за локална самоуправа Златко Перински, кој исто така присуствуваше на средбата, изјави дека Владата очекувала дека од градоначалничката ќе слушне план за решавање на проблемите, за централната власт да помогне во реализација на тој план. Како што рече министерот, од Арсовска не слушнал ништо конструктивно.

Очајна е состојбата во градот, очајна е состојбата во јавните претпријатија и како генерален заклучок се донесе дека немањето комуникација помеѓу советничките групи во рамките на Градот Скопје е една фаза од пречките за реализација на проектите од страна на Градот. Затоа, градоначалничката предложи до крајот на оваа недела да состави некаков план што пред сѐ ќе биде презентиран пред советниците во Советот на Град Скопје, иако нашите очекувања не се големи – рече Перински.

Арсовска, пак, смета дека е добро што за првпат по три години ВМРО-ДПМНЕ признава дека блокадата на градот Скопје е организирана и оркестрирана токму од оваа политичка партија преку нивните советници во Советот.

 Добро е тоа што Мицкоски се обидува да ги поправи грешките на своите сопартијци и прифати средба, но, за жал, по вчерашниот состанок, кој се надевавме дека ќе биде искрен и во насока на градење партнерски однос во корист на граѓаните на Скопје, тој повеќе наликуваше на политички циркус за покривање на неуспесите во други државни политики и добивање политички поени – рече градоначалничката на прес-конференција.

Таа посочи дека на состанокот претставила план за надминување на проблемите, но тој план не им се допаднал и побарале нов. Како што рече, предложиле советниците да ја изгласаат програмата за работа на ЈП „Комунална хигиена“ за јавната чистота, предложиле и план за набавка на нови еколошки автобуси, при што понудиле советниците да формираат Комисија за набавка на новите автобуси, која ќе ја спроведе целата набавка.

Имаме помалку 120 луѓе што би требало да ја одржуваат јавната чистота и некој сега седнува на маса и прашува зошто не е еднакво чисто како во претходните години. Па затоа што не ја гласате програмата, седум месеци не може да биде еднакво чисто и имаме ситуација каде што креирате проблем, а после не да нудиме решение туку додавате масло на огнот – рече Арсовска.

Градоначалничката соопшти дека предложиле и почеток на реализација на проектот БРТ, но побарале и Владата да го исплати долгот од 8 милиони евра кон ЈСП за бесплатниот превоз на студенти.

Одговорот што го добивме беше дека ќе го исплатат со повлекување на средствата за изградба на новиот булевар во Визбегово, Хасан Приштина, што го сметаме за уцена на штета на граѓаните на градот Скопје, а не партнерски однос и решение – посочи Арсовска.

Арсовска има рок до четврток да презентира програма за решавање на проблемите на скопјани

Таа не се смета виновна поради она што го ветила, а не им го испорачала на граѓаните, и нема да поднесе оставка. Според неа, досега има реализирано 800 проекти и дека не го реализирала само она за што требало согласност на Советот, а советниците од ВМРО-ДПМНЕ не го гласале.

Проектите не ги ветував само јас, ги ветуваше и Мицкоски. Зошто мислите дека целата вина ќе ја префрлате на мене? Да можев јас без нив, досега градот ќе беше среден. Не знам зошто сметате дека вината треба да е до мене за нешто за што јас решение имам од првиот ден. Јас бев најдобар градоначалник до септември 2022 додека не фативме нечии рачиња во медот, оттогаш станав најлош градоначалник. Зошто не барате одговорност од Советот? – рече Арсовска на денешната прес-конференција.

Градоначалничката посочи дека во предизборната кампања зад неа стоеле 45 кандидати за советници од ВМРО-ДПМНЕ, кои го гарантирале спроведувањето на проектите од програмата, а дека сега ја кочат.

Во моментот кога ќе ја откочат ако јас немам успех, тогаш ќе разговараме. Во овие години направив над 800 проекти за доброто на граѓаните. Тоа што некој не сака да ги види, тоа што има градоначалници што имаат имплементирано 2 проценти од својата програма, а лажат по телевизии дека имаат имплементирано 90 проценти и никој не ги прашува кај им се тие проекти. Во моментот кога овие со 2 отсто ќе ги прашате дали ќе дадат оставка, тогаш ќе дојдете кај мене, јас ќе ви презентирам сѐ што имам доставено досега и вие ќе ми кажете кој е во право. Јас за она за што не сум виновна нема да одговарам и затоа она што од мене го барате, нема ни тие да го добијат – рече Арсовска.

Градоначалничката Арсовска не одговори прецизно ниту на прашањето зошто ако Скопје е блокирано од советниците на ВМРО-ДПМНЕ, а не поради неа, чекала две години за да побара средба со Христијан Мицкоски, за да се обидат за доброто на граѓаните да ги решат меѓусебните недоразбирања.

Ние сме имале комуникација тука со советниците и со координаторите така како што би требало да имаме, меѓутоа секогаш кога на тој состанок ќе бидат презентирани аргументи и за една работа ќе се дискутира и тие ќе се согласат, понатаму на Советот се работи комплетно спротивно од тоа што е разговарано. Јас повеќепати сум го кажала тоа од говорница, очигледно е дека личностите што во Советот доаѓаат и работат како советници, првенствено треба да го имаат интересот на скопјани пред сè, меѓутоа во практика се покажува дека тие одеднаш за оние одлуки што се важни за скопјани, или ќе добијат насока да не гласаат или ќе излезат и ќе ја напуштат салата за да нема кворум или да нема доволно гласови – одговори Арсовска.

Според неа, таа не смета дека би требало да „седат на маса“, затоа што вчерашниот состанокот покажал дека нема желба за решение, затоа што сѐ што Градот побарал, било одбиено од Владата.