Возачко седиште на лева, наместо на десна страна, апарати што не се калибрирани на нашите мерни единици, дотраена опрема, возила за гаснење пожари стари и до 50 години, се само дел од проблемите со кои се соочуваат пожарникарите низ земјата. За да биде трагедијата уште поголема, ЈП „Национални шуми“, која секоја година се соочува со најмногу пожари во македонските шумски пространства, нема своја противпожарна едница и е принудена да ги користи ваквите едници од најблиските општини! Изразувајќи благодарност до странските амбасади и донатори што се трудат максимално да ни помогнат во заштитата од пожари, Душица Перишиќ, извршна директорка на ЗЕЛС, вели дека во земјава не постои специјализиран тренинг-центар за обука на пожарникари, па општините се снаоѓаат како знаат и умеат.

Таа открива дека во моментот располагаме со само 400 пожарникари, а потребни се барем двојно повеќе, оти европскиот стандард предвидува на секој 1.500 жители да има барем еден пожарникар. Таа вели дека стандардите за заштита од пожари не се формалност, а штетите од нив се немерливи и за државата и за економијата. Според Законот за пожарникарство, градоначалникот на општината на чие подрачје настанал пожар од поголем обем, во согласност со Планот за заштита и спасување, може преку јавен повик да ги повика граѓаните постари од 18 години да учествуваат во акцијата за гаснење пожар.

– Срам ми е што мора да ја споделам со вас потребата од секаква помош што сесрдно ни ја нудат странски донатори, оти сум убедена дека во земјава имаме и капацитет и финансии. Но ситуацијата е таква што мора да се снаоѓаме, затоа што од осумдесетина општини во земјава само 34 имаат свои пожарникарски единици. Под итно треба да се направи соодветен тренинг центар за обука на пожарникари, оти сега општини распишуваат огласи на кои се јавуваат по неколку лица, од кои ќе изберат еден кандидат, но по кој критериум, по кој стандард и како знаат дека тој е најдобриот ако не ја поминал соодветната обука и бил соодветно оценет – праша Перишиќ.

Таа најави дека во септември ќе ги сумираат резултатите за потребите на општините од противпожарната опрема што ја понудиле странските амбасади и донатори.
Заменик-министерот за труд и економија Марјан Ристески призна дека досега имало многу недоречености во законската регулатива, а малку или речиси воопшто не се почитувале стандардите за заштита од пожари, не само поради некоординираноста на институциите, туку и поради нискиот праг на толеранција при давањето дозволи за работа на угостителските објекти. По најголемата трагедија во дискотеката „Пулс“ во Кочани, која однесе 62 животи и нанесе сериозни повреди на 200 лица, институциите го вклучија алармот и прават комплексни истраги и контроли, а Ристески најави дека неговиот ресор интензивно работи на измените на повеќе закони и правилници што пропишуваат построги казни и механизми.
Според Џевад Кицара, директор на Институтот за стандардизација во државава се градат сè повеќе станбени и индустриски објекти, па оттука заштитата од пожари не смее да биде само формалност, туку да ја следи соодветната примена на стандардите.

– Да извлече поуки од неодамнешната трагедија и да се трудиме вакво нешто да не ни се повтори – додаде Кицара.

Како што веќе пишуваше „Слободен печат“ во последниве месеци, многукратно е зголемена продажбата и сервисирањето на ПП-апаратите. Законот пропишува дека на секои 50 квадрати треба да поседувате по една боца со тежина од 9 килограми, што значи дека дискотеките и ноќните клубови би требало да поседуваат најмалку три до четири вакви апарати, но и повеќе. Искусни лица од оваа бранша со горчина, констатираат дека требаше да се случи една ваква трагедија како пожарот во дискотеката „Пулс“ во Кочани, за фирмите да се свестат и да се сетат дека задолжително треба да поседуваат ваква опрема.

– Поседувањето ваква опрема може да послужи барем како средство за почетното гаснење на пожарот за да се спречи неговото натамошно ширење, но и за трасирање пат кон најблискиот излез за евакуација од просторијата што е зафатена со пожар. Рокот на траење на еден ваков апарат е 20 години, а по неговиот истек тој е максимално небезбеден за употреба и е потребно веднаш да се замени со нов. Потребата од противпожарна опрема во деловни простории, индустрии и слично е задолжителна и пропишана со Законот за пожарникарство. Во последниве години во земјава масовно се гради, па затоа инвеститорите треба да ги запазат сите процедури за ПП-заштита. Посебно треба да се истакне и потребата од поставување надворешни противпожарни скали за евакуација во новите згради, но и посебни противпожарни излези во угостителските објекти – советуваат вклучените во бизнисот со ПП-заштита.

Во Стопанската комора на Македонија се одржа Конференција за заштита од пожари во организација на Институтот за стандардизација на Македонија, на која дискутираа експерти, градежници и претставници на повеќе институции.