Таеквондо клубот ХУЛК испрати барање до Македонската таеквондо федерација за членство, а според раководството на МТФ, таеквондо клуб како што е Хулк треба за своето членство да биде на чекање безмалку четири години и после тој период да добие одговор дека на некое од наредните собранија ќе биде разгледано нивното барање за членство.

Таекводно клубот ХУЛК веќе од 2018 година има проблеми со МТФ. Иако уредно и навремено клубот си ги извршува сите обврски, по четири години сеуште не може да се добие согласност од Македонската федерација за да биде полноправен член на федерацијата. ХУЛК во изминатите четири години има учествувано на повеќе од 35 регионални натпревари со освоени повеќе од 150 медали за индивидуално и екипно натпреварување. Меѓутоа, клубот нема право да учествува во државните натпреварувања бидејќи нема лиценца која се издава од страна на федерацијата.

Низ текот на годините во клубот имаат членувано повеќе од 200 деца од најрана возраст и истите тие деца имаат право да се натпреваруваат рамо до рамо со најдобрите врсници во нашата држава. Опструкциите и заканите од страна на поединечни лица последните две години се повеќе заземаат замав, можеби поради фактот дека ХУЛК е еден од топ 3-те клубови во Македонија кои изнесува првопласирани натпреварувачи низ соседните држави.

Клубот не бара да ја „сруши“ федерцијата, само бара можност да ги оствари своите права како клуб и да настапува под боите на македонското знаме.

Како што и потврдуваат од Македонската таеквондо федерација, стигнат е допис за прием во МТФ од страна на здружение на граѓани Таеквондо Клуб Хулк Премиум Илинден. Овој клуб има добиено почетни инструкции за влез во федерацијата, но Извршниот идбор (ИО) на следната седница ќе одлучува што понатака.

Еве што стои исто така во одговорот на дописот од Михаилова & Стаменова Адвокатска канцеларија до МТФ:

– Согласно Статутот и правилниците на нашата федерација ова барање се разгледува на првата или некоја од наредните седници на Извршниот одбор на МТФ, ИО на МТФ согласно правилата усвоени од собрание на МТФ со мнозинство гласови одлучува за тек на ова барање.

Доколку ИО на МТФ донесе одлука за старт на контролниот период за пристапување на ова здружение кон МТФ, согласно дадениот рок уреден со правилници на МТФ крајната одлука за прием на полноправен член (Клуб) во МТФ на седница ја носи собранието на федерацијата со мнозинство гласови.

Почитувани,
Македонската Таеквондо Федерација согласно своите спортски достигнувања е сигурно една од најуспешните спортски федерација во Р. Македонија, доказ за наведеното се официјалните награди од страна на официјалната куќа за спорт во државата Агенцијата за млади и спорт за НАЈУСПЕШНА СПОРТСКА ФЕДЕРАЦИЈА МАКЕДОНСКАТА ТАЕКВОНДО ФЕДЕРАЦИЈА, НАЈДОБАР СПОРТИСТ ДЕЈАН ГЕОРГИЕВСКИ И НАЈДОБАР ТРЕНЕР БОРЧЕ КОСТОВСКИ ВО 2021 ГОДИНА. Согласно наведеното МТФ согласно закон за Спорт и својот Статут се грижи за квалитетот на олимпискиот спорт Таеквондо во Македонија, токму заради тоа има целосно уреден систен за квалитетно функционирање каде што спаѓа и прием на нови клубови во федерацијата.

НАВЕДУВАМЕ:
Македонската Таеквондо Федерација не ја сочинува едно лице, МТФ има свои органи и тела кои одлучуваат по однос на сите прашања, секако согласно статутот и правилниците на Федерацијата. Но апсолутно никој не може да влијае на гласањето на членовите на собранието на федерацијата, крајната одлука согласно статутот на МТФ за прием на нови клубови ја носи собранието на федерација.

Целта на МТФ е ширење на олимпиското Таеквондо во Македонија, само во овој момент пред, официјален прием во МТФ се три Таеквондо клубови, но секако контролата и квалитетот за прием на нови клубови е надлежност на органите на МТФ и тоа мора да биде така за да се зачува овој високо растечки тренд на нашата федерација. Секако дека наведеното барање ќе биде разгледано на следната или некоја од наредните седници на ИО на МТФ, и за истото членовите на ИО ќе се произнесат – стои во одговорот на дописот.