Властите започнаа истрага откако Доналд Трамп Џуниор, најстариот син на поранешниот американски претседател, вчера отворил писмо со неидентификуван бел прав во неговиот дом во Флорида, пренесува Си-Ен-Ен.

„Резултатите од тестот на супстанцијата не дадоа јасен заклучок за што точно се работи, но официјалните лица на местото на настанот не веруваат дека е смртоносна“, изјави Ендрју Сурабијан, портпарол на Трамп Џуниор.

Трамп Џуниор дели дом на Флорида со неговата свршеница Кимберли Гилфојл. Канцеларијата на шерифот на округот Палм Бич потврди дека помага во истрагата и соработува со Тајната служба. Трамп Џуниор го отворил писмото, во кое имало и смртна закана, испратено на неговата домашна канцеларија, пишува Асошиејтед прес.

На местото на настанот пристигнале припадници на итната помош во заштитни одела. Трамп Џуниор има важна улога во предизборната кампања на неговиот татко, често е во првите редови на настаните и се појавува во интервјуа. Ова е втор пат бел прав да му биде испратен на најстариот син на поранешниот претседател.

Во 2018 година, неговата тогашна сопруга Ванеса била однесена во болница во Њујорк, откако таа отворила плик адресиран до нејзиниот сопруг во кој имало неидентификуван бел прав. Полицијата подоцна соопшти дека супстанцијата не е опасна.

Во март 2016 година, полициските детективи и агентите на ФБИ истражуваа заканувачки писма испратени до станот на братот на Доналд Трамп Џуниор, Ерик, во кое исто така имало бел прав за кој било утврдено дека е безопасен. Коверти со бел прав исто така беа испратени двапати во 2016 година во кулата Трамп, која служеше како изборен штаб на Трамп.

Измамните напади со употреба на бел прав играат со стравовите кои датираат од 2001 година, кога писмата со смртоносниот антракс беа испратени до новинските организации и канцелариите на двајца американски сенатори. Тие писма убиле пет лица.